التمضيج ... الترصص .. الذوق العام 18 +

هذا الموضوع يحتوي على امور و تلميحات قد يراها البعض انها لا تتناسب مع من هم دون سن ال 18
لذلك نرجو ممن لم يتجاوز ال 18 او المحافظين المتحفظين عدم قراءة هذا الموضوع

و شكرا
--------

في البداية احب اعرفكم بنفسي قبل لا اتكلم بصلب الموضوع , انا شخص ديمقراطي اؤمن بتعدد الآراء و احترم كل رأي
و كنتيجة حتمية انا احترم الحريات , و احترم تبعات الحريات بأن حرية الانسان يجب الا تتعدى حرية الاخرين

المعادلة : احترم الاراء = احترم الحريات
احترم الحريات = عدم التعدي على الاخرين


طيب , ادش بالموضوع

طلعت اليوم مع اهلي و رحت مجمع ... و اليوم بالذات كنت قاعد بقهوة و ماخذ زاوية
يعني القزيزة يشترونها مني بخمسين دينار خاطر ياخذون هالموقع الاستراتيجي

المهم , لفت انتباهي شي بايخ شوي , الا و هو الترصص و التمضيج

و التمضيج حق اللي مو فاهمني : مو ان يكون مقاسك لارج و تلبس ميديم .... لااااااا

التمضيج اللي حاصل بالبلد ان الوحده مقاسها اكس لارج و تلبس سمول ... أو أكس أكس لارج و تلبس سمول

ليش يبا ... مو زين لكم يا حبايبي ...

المؤخرة تشوفها بالابعاد الثلاثية ... و مابي اتكلم عن اهتزازاتها ... او الحركة الميكانيكية لها ( المصطنعة ) و الغير مصطنعه
لانكم اكيد شايفين و اكثر مني ...

الاخوات المتحجبات صار عندهم لوثة ... خو ما يصير متحجبة و لابسة بدي ضيج و صدرج طالع , مو راكب كللش
اصلا ما يصير يا جماعة شفيكم انتو وين رايحين ...

هذا غير حجابكم اليديد بو تفخة ... تلاقي الوحده عصاقيل و شكلها جنها زرزور ... ز راسها منتفخ جنه براشوت
و في نوع ثاني مبوز

انا ما اشبهه الا انه ديد ( ثدي ) ثالث طلع حق الحريم بروسهم , انزين الاخوات اللي متمسكين بهالموضة مالت حجاب بو ديد
على الاقل خل تسوي الانتفاخ اللي براسها متناسق مع حجم ديودها ... علشان لا تصير اشكالكم مصيبة

في بنات ماشالله حلو عليهم تسوي كبة صغيرونه و فوقها الحجاب , يطلع شكلها ذرب و حبوب و امور ...

لكن في بنات .. اللهم يا كافي حاطين اباجورة فوق دماغاتهم ..

المشكلة ان هالنوعية تلبس بنطرون سكيني على قولتهم يعني ضيج من تحت ... و المشكلة الاكبر ان هاللبس ما يمشي الا حق الرشيقات

اختي وزنج 80 و طولج 155 مو لازم ... بلاها شغلة يعني .. ميخالف في مليون ستايل تقدرين تسوينه بعمرج

بس مو لازم تتهولين و تتمضيجين بجينز و بدي لو تنزلين نص وزنج ما يدخل فيج .. و حاطة هيلمان فوق دماغج و تمشين من سوق لي سوق

اختي صدرج كبير و شكلة زبالة الله يصبرج على ما بلاج .... بس احنا مالنا ذنب لا تبلشينا معاج , ما تقدرين تسوين تجميل
في لبس يستر العيوب و يرتب المسائل

هذا معليش انتهاك للذوق العام

و الوان .. الاصفر و البنفسجي ... جنه قوس قزح زايع عليهم

يا جماعة عيب... مو صحيح هالشي في شي اسمة ذوق عام خلينا من مبدأ الستر و العفة و الامور الدينية على راسي

بس خلونا بموضوع الذوق العام , في انتهاك صارخ حق الذوق العام من قبل البنات و الشباب بعد ... و ماراح اتكلم عن اللبس او الشعر
لان كل زمن و له اهازيجة و حفلة الازياء و الالوان مالته

الذوق العام يقول ان الواحد مو لازم يلبس على الموضة ... لان الموضة ساعات ما تخدم الانسان , خصوصا اذا كان متجاوز وزنة الطبيعي
و حتى المكياج , ساعات ما يكون الخط السائد ماشي على ويوهكم يا ناس ...

بعض الشباب مسوين سبايكي و تسريحات يديدة غير نمونه , لكن ويه الواحد منهم ما يركب عليه الا تواليت , و الا قرعة

مثال : يعني تلاقي واحد خال بكل ما تعنيه الكلمة ... و مسوي تمليس و مسوي سبايكي و لسان حالة يقول (مابي ابي اسوي مثلكم مابي )

هذا كلة يهون ... ميخالف

في بعض الشباب الله يهديهم , يلبسون بنطرون الرياضة الرمادي في غير وقت الرياضة ... شكلة مرتب .. و الواحد ما يبي (يتمضيج)
في بنطرون جينز .. و الحين دخل الصيف

بس يا اخي لما تحب تلبس بنطرون رياضة ... البس تحتة صروال , لغاليغك و اعضائك التناسلية مو شغلنا الشاغل يعني
اكو ناس يلبس البنطرون القطن الرياضي بروحة و يطلع , لا حيا و لا مستحا .
و الا يلبس تحتة بوكسر ما يمسك الامور عدل ... انتو فاهميني ها ؟؟؟؟

في كلمة دايما يقولونها عن الحريم و البنات اللي مو لابسين عدل : هذي اخوانها و الا ابوها و الا ريلها ما شافوها قبل لا تطلع ؟؟؟

حبيبي , انت لما طلعت من بيتكم خواتك و امك و يدتك ... ماشافو اغراضك طالعة من البنطرون ؟؟؟؟

ترضى اختك تشوف مالك حبيبي ؟؟؟

اذا جوابك لا ما ترضى على خواتك ... ترى حتى احنا خواتنا و اهلنا مو مجبورين يشوفون مالك يا الفحل

عيب عليك خل عندك نخوة .. اذا مو على الناس اللي بالشارع , على اهلك اللي بالبيت

=====

و الله مو هذي الحرية , لا تخلونا مطنزة عند الناس ... يعني هم البلد فساد و بوق و تجاوزات و تردي في الخدمات
و عاهات ؟؟؟؟

و الله يا جماعة احنا زينين بس يبيلنا احد ينبهنا شوي

الناس ملت من الخطاب الديني , و عاداتما و تقاليدنا ... خلونا نتكلم بالهجايص على قولة احمد زكي الله يرحمة , و نتكلم

=====

بالنهاية يا ناس

اللي يعرف احد متمضيج و مترصرص و يان و قاعد خل يعطيه لنك مدونتي ... و اذا ما عنده انترنت طبعوله الكلام هذا

و تحياتي لكم

و اسف على البذاءة

اخوكم

مانتوفاني