الكويت الان

السبت، 21 يونيو، 2008

من رحلاتي الجميلة - سويسرا - 2

يا جماعه اللي لي الحين ما حجز حق عطلة الصيف
يفكر مليون مرة بسويسرا
طبعا الستيك هذا من النوع اللي يغمى على الانسان عقب ما ياكلة
ولما يخلص الواحد و يمسح الصحن يتمنى لو انه في مجال بالمعدة يستوعب ثلاث
ستيكات اضافية ... لكن للاسف , تشبع و انت في قمة اللذة
الطلة من هالطرف من الشارع تسوى ...
و الورد حاضر بقوة

درجة الحرارة ... بدون تعليق


الهاليبارديز , فرقة عسكرية سويسرية ... نفس الزي الرسمي من 800 سنة

و سلاحهم الرسمي ... فاس طويل

و الحين مع سياسة سويسرا السلمية ... دورهم ينحصر في تقديم العروض الوطنية

و يطبخون خوش شوربة (ريحتها حلوة) ... بس للاسف فيها شوي خنزير علشان جذي ما جربتها

منظر من مدينة جنيف ... ما حبيتها كثر ما حبيت الارياف

لكن تسوى تقضي فيها نهار



بروح يا جماعه

ابي سلف 10000 دينار تكفون


مانتوفاني

هناك 50 تعليقًا:

Blog 3amty يقول...

عشر آلاف !


عشان تروح وتصورلنا ستيك وورد !!


أعطيك 12 ألف بس تصورلي كل شي .. كل شي .. عارف شقولك :P

mantovani يقول...

عطني و اصورلك كل شي تبيه

و ما تبيه !!



====

يمكن اشتري مطعم الستيك هذا و نتشارك

و الله نكد خير

تدري ان المطعم اعلاه

يطل على البحيرة اللي في اعلى المدونة


مانتوفاني

متفائل يقول...

شجعتنا على سويسرا

بس بعرف التكالبف المالية للسفرة بالتفصيل ، التذكرة ، السكن ، مصروف الجيب اللازم ، مصاريف سياحية (تلفريك مثلا) إلخ

.......................

هل سويسرا احلى من النمسا

mantovani يقول...

متفائل

تحياتي لك

بالنسبة للتذكرة :
طيران الامارات - سياحية - 270 د.ك

السكن : يعتمد على المنطقة اللي بتسكن فيها و طبيعة سكنك -فندق -شقة -شاليه
انصحك تحجز مع :
http://www.interhome.ch/


التنقلات :
التاكسي راح يخليك تفلس من ثاني يوم
و القطارات تنفع حق المسافات البعيدة
اذا تبي تزرق باريس مثلا

انصحك تتوكل على الله و تأجر لك سيارة
جير عادي + جارمن فيه خرايط اوربا

200 دينار للسيارة


المصروف :
الاكل غالي و اذا بتقعد مدة طويلة و بتسكن بشقة ... شي لطيف لو تشحن معاك
كرتون صغير فيه بعض الاساسيات

السوق في شغلات غالية نار ... و شغلات
اسعارها معقولة نوعا ما

صعب اقولك مبلغ لاني ما ادري انت شنو طريقتك بالسفر


-==

بالنسبة للمقارنة بين سويسرا و النمسا
صعب افيدك لاني اخر مرة رحت النمسا
كنت صغير , لكن حسب الصور

الطبيعة تتشابه

و بسويسرا النظام وايد مميز


مانتوفاني

kila ma6goog يقول...

10000

ull buy a house there?

mantovani يقول...

وحياتك يا مطقوق

10000 دينار يادوب مصاريف كلام فاضي

العقارات هناك اغلى ... و ضرايبها السنوية غالية + بالاضافة للتأمين الاجباري على العقار

اي 10000 دينار يا معود

====

مانتوفاني

lawyer يقول...

لووووووول انا عشقي سويسرا
ديرتي الثانيه ..

كل صيف هنااك ..

شووف الارشيف مالي .. اوغست 2006 و 2007 حااطه خطه سير رحلتي و صوور مونترو و الشومونيه .. لوزرن و لوغانوووو ووايد اماكن.. وايد امااكن روعه فيها...


اذا ماجربت البراشوتينج في انترلاكن .. لازم اتجربه هالسنه .. بس لازم تعرف الجوو قبلها .. لان عجييييييييييييب .. شعور ثااااااني


انا احب بحيره جنيف قبل الزحمه بس من الصوب الثاني..

بس لازم تحسب حسابك انك تطلع من جنيف الساعه 12 الصبح لانه بعدها تصير عرعر مو جنيف

هذرت عليك وايد بسسسسس صج شدني البوست لاني اعششق سويس

lawyer يقول...

على طاري البنزين ..

يعتمد وايد على المحطه الي تعبي منهاا.. و اذا يوروووو او فرنك سويسري.. مراا و انا راده .. من انسى رايحه سويس.. عبيييت بانزين ب42ديناااااااااار ليششششششش مدري !!

secret يقول...

MERIT و جبريت بسويسرا يا مانتوفاني

قمة الشاعرية و الرومانسية

والله خوش صور ترد الرووووح

بصراحة و ناطر الجزء الثالث

10,000؟؟؟

Temporary increase in Credit Card limit up to KD 10K

ما يصير؟ :)

5roofa يقول...

/;

ليش عشر تالاف؟؟؟ لوول اهي تكلف هالكثر يعني سفرتها؟؟؟


بس شكلها تشووق والله بس متاخر خيو قلت لنا عقب ما ججزنا و طارت الطيور بارزاقها لول

salamz dear...

صبا يقول...

اهلييييييييييين خيوووو

واااايد طاااايفني

اتصدق اول مره اليوم اشوف الالجزء الاول من الرحله :(((((

اليوم فتح معاااااي
بس يالله لحقت علي الجزء الثاني

يا حلو الورد والطبيعه والجو هناك

بس ليش زقاااااااااير وجبريت ؟؟؟

ما عندك ولاعه ؟؟

انا عندي ثنتين بالجنطه!!!؛)))

لا اتغشمر معاك عندي ولاعة الفحم
تبيها تنفع بس اخاااف تحرق شواااربك

هههاااااااي
ناطره الجزء الثالث بانتظار يالشيخ

تحياتي....

ولد الديرة يقول...

Rue de Bern

بجنيف

اوكي

:q

darkness يقول...

سلف؟

يعني بتردهم؟؟

Kuwait يقول...

ولا يهمك نسويلج قطيه ;q

Kuwait يقول...

أهم شي نسويلج !!
لوووووووووول
عادي عادي حدي مضيعه بالمطار ولويه :|

Mamloo7a Q8ia يقول...

ههههههه
عشر الاااااااف
يلا خلاص نحط صندوق تبرعات
من البلوقرز ونيمع لك
تستاهل على هالصور العجيبه

Selezya يقول...

ابشر

mantovani يقول...

لوير- المحامية

يبا انا دشيت ارشيفج ماكو سويسرا

اكو بس المباركية :))))) شوقتينا حق التمشي بالسوق

---

بخصوص خط سيرج حلو وايد بس جنوب سويسرا
و الريفييرا السويسرية احلى شوي

اما عن انترلاكن حسافة ما وصلت لها
و يسولفون لي عن البلو سي يقولون شي خيالي

انشاللله بس تعطيني 10000 دينار
راح اروح هناك و اصورلج صور غير نمونه

==

احسن محطات بسويسرا agip + BP

===

mantovani يقول...

سيكرت

و الللله مو زقايري طال عمرك هذا صاحب الدعوة قاعد على يساري و زقايره صاير يمي من كثر الزحمةعلى الطاولة

انا يبا بطلت زقاير من سنين

انشالله تتزوج و ينحكم عليك ما تشمها
حتى اهااهههااهاههاهاهه




مانتوفاني

mantovani يقول...

خروفة

و الله اهي ما تكلف هالكثر حق اللي يعرف يدبر مصاريفة

لكن الواحد اذا يبي يفتر سويسرا كلها
ويقعد وايد

اي و الله 10000 و 50000 بعد

==
الله يهنيكم انشالله بسفرتكم
و اي مكان بالدنيا راح يكون
حلو غصب اذا الانسان يبيه يكون
حلو + لمت الاهل او الاصحاب
==


مانتوفاني

mantovani يقول...

صبا

روحي عني لا تكلميني انا محاربج

انتي وينج يبا صاكة مدونتج مادري
صاكة التعليقات و قاعدين نحاتيج

اخر شي طلعتي تحوسين بكل المدونات
الا مدونتي محاربتها

اشوة اللي تطمنا عليج :))

===

و الله مو زقايري و لا جبريتي


ولاعتين بجنطتج ؟؟
بعدين شكبرها الجنطة اللي
حاطة فيها ولاعة بخور
اكيد فيها مبخر على الاقل
==


يا صبا انتي منورة المكان
و الجزء الثالث اذا الله كتب
و نزلته

نبيج اول تعليق كالعادة

و ما يهزج ريح

===

مانتوفاني

mantovani يقول...

داركنس - الظلام

اذا ناوية تسلفيني

امممممممم ترى المبلغ بسيط
ما تسوة اردة لج فشلة


مانتوفاني

mantovani يقول...

ولد الديرة

ثبت اعلان توشيبا بس

لول


مانتوفاني

mantovani يقول...

كويت


اشدعوة يبا (نسويلج) قطية !!!

ما قريتي شتقول صبا .... تبي شواربي
تحترق من الولاعة

:))

انا ما عندي فكرة شتسوين بالمطار
بس اهم شي ترجعين بالسلامة


مانتوفاني

mantovani يقول...

مملوحة كويتية

لا اعوذ بالله ... مانبي تبرعات

نبي سلف :))

و اردهم باقرب فرصة


مانتوفاني

mantovani يقول...

سيليزية

يطول عمرج يا رب

تبين رقم حسابي شي؟؟


مانتوفاني

صبا يقول...

ههههههههه

لا حرام عليك انا كنت افتر واعلق بالمدونات وكنت ادخل مدونتك بس ما يطلعلي الا البوست القديم والله وتفاجأة بورووود وحركات رومانسيه وسويسرا
والذي منه
ياعيني عليك يا بختها المدام الله يهنيها

المهم.....

من امس وانا افكر اشلون اروح سويسرا
وقلت ما كو الا انك تاخذني معاكم :))

اصور بدالك كل شي واخفف عنك هالمسؤليه وتاخذ ال 12 ألــــــف من

Blog 3amty

وتطلعهم من جبده ؛)))))
والنص بالنص وراعي النصيفه سالم



شرايك ؟؟؟

والله ما تتحسف ,عاد انا ونيسه بالسفر ,,,
طق مطاقق علي ,, P:
؛)))))))))
تحياتي

صبا يقول...

اي ,,,,شوفني... خوش بنيه كتبت لك تعليق ثاني اعوض الي فاتني ,,,,؛)

هااااااااا رضيت الحين ولا بعد !!!!!

Don Juan يقول...

أووووخ سويسرا طلعت أحلى من أبها :d

لا بس بصراحة تسوى عشرة آلاف د.ك

BTW

سويسرا بالصيف باردة ولا دافية ؟؟

أنا واحد فيني فقرة برودة أبي مكان بارد مثل Essex :)

lawyer يقول...

http://floristq8.blogspot.com/2006/08/blog-post_15.html

هذا فيه صور :)

mantovani يقول...

صبا

و الله عاد انا و المدام كلنا تحت امرج
بس تستحملين قعدتنا من الفير و الحوسة مالتنا و جناطنا و ركضتنا ؟؟

لج مني 10000 دينار اذا قدرتي تصمدين
معانا اسبوع

هذا غير ان ما ناخذ معانا عزاب

===

بعدين يبا انتي راعية المكان
و المدونة مدونتج , انتي من المشجعين
الدائمين اللي اعتز بتعليقاتهم

و الله يشهد انج تسوين جو بكل مدونة تدخلينها و الكل يعزج

الله يهنيج يا رب


بعدين شهالثقة ... ونيسة بالسفر مرة وحده و تعجبينا ؟؟؟

انا قلت لج يا صبا ماراح تقدرين
تستحملينا ... تنحاشين من المطار



مانتوفاني

mantovani يقول...

صبا


منو الولد اللي بالصورة اللي مريض ؟؟؟

الله يشافيه انشالله

مانتوفاني

mantovani يقول...

دون جوان

هلا و الله بالحبيب

لاااااااا دير بالك ابها احلى من سويسرا

و عرعر بعد احلى

====

عزيزي سويسرا تسوى 10000 و اكثر بعد

و اذا تسأل عن الطقس ... الجواب راح اييك بالبوست القادم


مانتوفاني

mantovani يقول...

لوير - المحامية


و الله خوش صور بعد

انزين هذي مونترو ؟؟؟

===

انشالله اذا هالسنة رايحين قوليلي
ادليج المطعم اللي عنده اقوى ستيك


مانتوفاني

صبا يقول...
أزال المؤلف هذا التعليق.
فريج سعود يقول...

لنا الله
وعليك بالعافية

lawyer يقول...

صورتين في مونترو
و صورتين في لوغانو...

بس انا احب الغروب و الغيم عشان جذي صوري شكلها في مكان واحد

انشاء الله بروح على اخر جولاي

وين محل الستيك ..؟؟

انت جربت المطعم الي في الجبل فووق ..
الي على الفحم كل شي و الشموع

ماكو كهربااا

كل شي بداائي؟؟
ولازم تروح له في النهار عشان تستانس

ManalQ8 يقول...

سويسرا
من الدول الي حلوة الي زرتها

عليك بالعافية

mantovani يقول...

صبا

الله يقومة بالسلامة و يدفع عنه البلا
و يكبر و يترس لكم البيت وناسة و فرح
و انا بدعيله الله يشافيه

هذا اختبار من الله عز وجل
و انشالله انتو قده و قدود ...

مانتوفاني

mantovani يقول...

فريج سعود

كلنا لنا الله

اقول ما عندك 10000 دينار سلف ؟؟؟
ودي اروح هالسنة بعد


مانتوفاني

mantovani يقول...

لوير - المحامية


عيل دام تحبين الغروب ... البوست الياي , اهو اللي يفيدج


اما بخصوص المطعم خليني افتح خريطتي واقولج وين بالضبط


المطعم اللي تقولين عنه وين بالضبط ؟؟

لاني دخلت اكثر من مطعم جوهم نفس هالجو اللي تقولين عنه

و صجججج

نصيحتي لج يوم 1-8-2008
روحو قضوا اليوم في
Villars-sur-ollon

الكرنفال حده خطير هناك ..
و اخوانا الخليجيين ما يدلونه
و لا يناسب جوهم البايخ


مانتوفاني

mantovani يقول...

منال ...

انتي ماشالله تصورين كل شي بالرحلات
و ماشالله صوركم فيها شي حو مميز عن باجي الصور
ما عندج صور حق رحلة سويسرا

مانتوفاني

lawyer يقول...

امر على فيلار بس ما احب اروح لها
ربع امي هنااك
ساكنين ...

فماروح مكان فيه سكان كويتين

انا يوم الكرنفال اصعد كشتاد
GSTAAD

الصيف الي فات كان يوم الكرنفال انا في كشتاد بالاس.. و تابعنا مباره السعوديه و العراق اظن ..

لان رفيجاتي سعوديات



خلاص انشاء الله بفج خطي السويسري و اطلعلك رقم المطعم لانه لازم حجز...

احنا نروح من مونترو .. بس انت مدري وين بتكون فانت شووف الخريطه و القرب...




اروع جيز فوندو تاكله بالدنيااا في جريييه

بالقلعه
فظييييييييييع

و اذا بتروح مصنع الجن شي فظيع

بس جريييييييه احبها وايد لانها 20 دقيقه بس
فحدها قريبه لنا

نروووووح العصاري انتغداا و نشووووف الغروب على الجبل ..

و نحدر قبل الساعه 9 ..



بانتظااااااار البوست الياي :))

ManalQ8 يقول...

تسلم اخوي
تامر امر

راح انزل موضوع جديد بس صور سويسرا

ما طلبت شي

انا رحت رحلتين

اول مرة لجنيف
والثانية زيورخ

وطبعا بالسفرتين كنا نسوي رحلات برة هذي المناطق

امهلني كم من يوم وتشوفهم على صفحات مدونتي ان شاء الله

وحياك الله
:)

ga6oo6a يقول...

سويسرا جنه ..
احلى مكان للراحه النفسيه و خاصه منطقه فيلارز..الوالد كل سنه لازم سويسرا و تعودنا من 89 انروح انقطعنا جم سنه كتغير بس مردنا نرجع لها و المكان مثل ما اهو ...

افيان حلوه و لويه ..
جنيف ما احبها لانها كلها عربووو
قشتاد منطقه راقيه
لوزان و منتروه روعه
مدينه الجبن حدها اتينن
لوقانو..بلو سي ..انترلاكن..شاموني حد الوناسه...و طبعا مناطق اللي يم فرنسا و اللي يم ايطاليه شي خيال.بس ما حبيت اللي يم المانيه لانه الناس قلجين ويع ما حبيتهم بس هم حلوه عندهم مكان فيه شلال كبير حده نسيت شسمه اسامي صعبه بس كله محفوظ بالنفيقيشن اشوه..و الوالد ما اقصر اساعدنا..نظامنا بسويسرا البسطه و مطاره جاي و صمون و دقوس قراش و حمسه بزاليه ايبااااااااااه..و مكرونه حدها عجيبه مع الماي الحار..و بليل لي صارت درجه الحراره 0 الوالد معدس و بالبلكونه وااااي...
مناطق حلو بس اسميهم صعبه لانها بالفرنسي و انا ثقافتي روسيه ..
:P

بس احلى شي انه الواحد اكون له بال وسيع على الطريج الظلمه و اتكون ذاكرته تصويريه حق الطريج يعني انا كنت مساعد كابتن و حامل الخرائط و النفيقيشن لزوجي ..

واااااي ليش بروح لبنان هالسنه ابي سويسراا ""قالي بس ما طعته ""

:)

صبا يقول...

شوف يا ولد الناس

من ادش مدونتك وشوف الستيك اموووووووت من اليوع
حراااااام عليك

يالله نبي بوست يديد:))

mantovani يقول...

لوير -المحامية

في البداية احب اقولج ان مافي
على جبن فوندو جرييه في القلعة

و في البوست الياي راح احط صور
خذيتها بالقلعة

===

لكن بخصوص فيلار فأقولج اسمحيلي
مافيها وايد كويتيين اهم كلهم بيت العسعوسي اللي عندهم شقق تايمم شير
الى يوم يبعثون

و عايلة صغيرة ابو و بناته اهم كل سنة يصيفون هناك حسب ما قال لي ابوهم

===

لكن مسألة انج يوم الكرنفال ... قاعدة مع سعوديين في Gustaad
هذي جريمة تضطرني اني ابلغ السفارة السويسرية انج بتسوين اعمال تخريبية
هالسنة علشان ما يدخلونج :)))))))


=====


اتمنى لج اجازة سعيدة هالسنة



مانتوفاني

mantovani يقول...

منال

و انا ارجع و اقول ان صوركم راح تكون غير ...

و انا اقول حق زوار مدونتي

ترى لابد من ترقب صور منال
و الدليل على هذا شوفو ارشيف مدونتها

مانتوفاني

mantovani يقول...

قطوطة

اهاااا انتو من ربع فيلار , و شهد شاهد من اهلها ...

تكفين شرايج فيها ؟؟؟

اما بخصوص المناطق اللي تسولفين عنها
للأسف ما مداني اروح حق انترلاكن و بحيرة البلو سي ... خصوصا البحيرة هذي اللي كلمن يقول عنها شي خيالي ...

بصراحة و انتي صاجة يبيلها ذاكرة مو طبيعية ... خصوصا ان النافيجيشن مو كفاية , انا اكتشفت ان الخرايط الكلاسيكية العادية مافي غنى عنها

اما بخصوص موضوع الكابتن و مساعد الكابتن ... انا زوجتي مسكينة ابتلشت في كابتنها لاني اضيع وايد و ساعات
الهى بالاغاني على اساس المزاج و الموسيقى :) , و فعلا لابد من وجود مساعد كابتن ...

تحياتي لج قطوطة و اتمنى لج اجازة سعيدة

مانتوفاني

mantovani يقول...

صبا

و الله ياريت تجربين هالستيك مع ماسترد حار

يدوخ ...

و البوست القادم قيد التحضير


و حاضرين يا صبا



مانتوفاني