الكويت الان

الخميس، 11 سبتمبر 2008

المتهم بريء حتى تثبت ادانته

ماشالله

رمضان هالسنة مختلف تماما يعني برامج غير و مقالب غير و كامرات خفية شكل ثاني و اخبار غريبة
و زلازل ... غبار و رطوبة بنفسس الوقت و هم يطق مطر ( تبارك الرحمن )

مابي اتكلم عن المسلسلات (( لتجنب الملل الذي اصابكم )) لول , لكن كل سنة بنقول هالسنة غير , الوضع يرجع لي ورا

الله يعافي سلومي و موقعه اللي عرض لنا اسد الجزيرة اللي منعوه علشان (الصج) يزعـّل

======

ما علينا

مسألة ان رجل امن يغازل بنات ... قلنا عادي شالمشكلة اهو مو ياي من المريخ , بعدين بناتنا الله يهداهم اهم اللي يحكونها على النجوم
و قلنا ميخالف .

رجل امن يخالفك و يهزأك و يخليك تحس انك كلب ابن كلب لمجرد ان عنده مشاكل بالبيت

لكن توصل المسألة لي العبث بأمن الدولة !!! طيب شلون و ليش و حق شنو ؟؟؟

السالفة اللي تداولتها وسائل الاعلام و سوت ضجة من يومين و كان بطلها ضابط في امن الدولة يمسح الممنوعين من دخول
البلاد من انظمة الداخلبة , بمشاركة احد الضباط المسرحين عن الخدمة

طلع في معاهم بطل يديد ... اخو محافظ البصرة اللي يمنا على طول ...

طيب هذيل شنو يستفيدون ؟

فلوس طبعا ... حسب وسائل الاعلام يقولك 6000 د.ك على الراس ... يعني لو يدخل 10 اشخاص راح يطلع 60000 دك

يعني اللي خلى الضابط هذا يخون الكويت اهو الفلوس (بزنس)

على فكرة ... وضع العسكريين بالكويت محتاج اصلاح و تعديل
لان العسكري بالكويت مشكلته مشكلة ... مستهدف من تجار المخدرات
و مستهدف من مكاتب التكييش , و مستهدف من البنوك @@

نتسائل ليش (وايد) عسكريين عليهم بلاك ليست من الشركات و البنوك و ملاحقين و غير منتظمين بالسداد ؟؟
ليش اهل التكييش يعتبرون ان العسكري صيدة دسمة و وجبة مغذية لهم ؟؟؟

طيب ...

انا اشوف من وجهة نظري ان العسكري بالكويت معد و مجهز ماديا (مسدس + رشاش+ بدلة + دببات + ف18 + اباتشي)

لكنه يواجه صعوبة في الادارة المالية (الا ما ندر) ....

شنو الحل ؟

المشكلة ان العسكري في مرحلة (الدراسة) العسكرية يكون فكرة محصور بالآتي : سيارة + سفرة قوية + عزيمة قوية
نتيجة للكبت اللي يعانيه في هالمرحلة ... و يتسلف من البنوك و مكاتب التكييش ... و يخربها و يقعد على تلها

انزين ... البنك ياخذ 50 % من الراتب ... و بو فلان موقع على كمبيالات حق بو علان

اخر شي ما يبقى من راتبه ( متليك )

و بعد سنتين بالكثير يصحى ... و يقول بتزوج (علباله الحل الجذري)

و تتعقد الامور اكثر لان الزوجة تتدبس بعقلية الاخ ... و تصير استهلاكية (بقصد او بدون قصد )

و تتدحرج كرة الثلج

لما توصل الى مدى سيء و يسقط في شباك احد او بعض الاتي :

1- موزع مخدرات

2- بلاك ليست

3- شيكات بدون رصيد

4 - اخو محافظ البصرة

5 - استخبارات دولة اخرى

6 - مشاكل اخرى .... الخ الخ الخ



حل المشكلة يجب ان يكون توعوي لمجرد التحاق الطالب بالمؤسسة العسكرية
و ان يتم تنبيهه على المخاطر (الغير مسلحة) عليه

هذول عيال الديرة ... مو غرب

شدعوة !!!


اللهم احفظ الكويت و شعبها و اميرها من كل مكروه


مانتوفاني


.

هناك 33 تعليقًا:

صبا يقول...

الاولي:)))

برد اقرا واعلق

صبا يقول...

خيانه ,,,,والي يخون ديرته لازم تطير رقبته

للاسف صار الدينار اغلي واعز من الوطن

عسي الله يحفظ الكويت ويحفظنا من هالعصابه والمرتزقه


وما خفيه كان اعظم يا خوي,,

غير معرف يقول...

اغلب داخلي السلك العسكري في الكويت هم من المتردية والنطيحة والموقوذة

وكان الضابط المرتشي والخاين يتيمع مع اخو محافظ البصرة في شقة انس لنقيب في الشرطة بالسالمية

Blog 3amty يقول...

(( لتجنب الملل الذي اصابكم ))


تتوقع مشيعل كان يقصدها :P



==================


المونت يا آخي آخر مره أستفدنا من العسكر كان بحرب الرقة قبل ألف وتعش سنه، ويومها ما حاربو بعد دنقرت سفن المعتدي وأستسلمو !!

أنا أقول سرحوهم وخل نصير مثل اليابان ولا سويسرا أبرك :P

secret يقول...

انا ما شفت أسد الجزيرة للحين و لكن بناءا على نصيحتك للمسلسل من خلال المكالمة الهاتفية .. راح اشوفه ان شالله

نرجع للموضوع ..

يا عزيزي اكثر مشاكلنا متعلقة بالتوعية يت على هذي .. و هناك خطأ شائع يقع به الكثير عندما يعتقد ان الزواج هو الحل الجذري في حين يكون بداية المشاكل الأبدية .. صح كلامك

على صعيد آخر .. فانا للحين ما تابعت اي مسلسل و لله الحمد .. فقط كم حلقة من التنديل و ذلك لامور متعلقة بالتوقيت .. و بصراحة ما عجبني للصبغة الحزينة المبالغ فيها

eShamiYa_RockS يقول...

ضعق ايمان+ الطيش و عدم تحمل مسؤولية+ الحاجة المادية+ الاستخفاف بالأمور.الخ
كل ذلك عوامل أدت الى هذا التصرف

Mohammad Al-Yousifi يقول...

أشد العقوبة

Ra-1 يقول...

كلامك صحيح
الله يحفظنا :/

Miss-Q8 يقول...

و الله ياخووي لو شنو .. لو نموت يوع
ما نخون أرضنا .. و لا نحملها و نحمل أهلها غلطة احنا طيحنا نفسنا فيها

لو كل واحد غلط و قلنا ميخالف ولد ديرتنا , وين بتروح هيبة القانون إلي أهيا اساسا ً " الله بالخير "

Fahad Al Askr يقول...

رب البيت كريم

mantovani يقول...

صبا

شمقعدج تالي الليل ...

الله يحفظنا و فعلا ما خفي كان اعظم

مانتوفاني

mantovani يقول...

محسد

انا اتفق معاك ان (( بعض )) النوعيات في السلك العسكري
هم من : النطيحة و المتردية و النطيحة
على شوية سقط لقط

شنو الحل ؟؟؟

هل الواسطات اللي قبلتهم بالكليات
العسكرية اهي السبب

خوش يمعه في شقة السالمية :

عمار يا البرتقالة

مانتوفاني

mantovani يقول...

بلوج عمتي

يبا صاحبنا قاصدها
و ما عنده سالفة كللش من كتب المقال
لي اليوم

-----

حبيبي عيل اللي ما يكملون رابعه متوسط وين يروحون اذا لغينا الجيش ؟؟


مانتوفاني

mantovani يقول...

سيكرت

اسد الجزيرة عمل فني ضخم , و راح يفتح لك افق انك تقرى في تاريخ الكويت

-

مثل ما قلت عن جزئية الزواج بالنسبة
للناس (اللي منهم العسكريين) اللي ما يعرفون يديرون اموالهم و شلون يعتقدون انه يحل مشاكلهم بالوقت اللي
يزيدها تعقيد

-

مسلسل التنديل كان ممكن انه يكون
رقم واحد لو كان 15 حلقة

لان وايد فيه تمغيط .. مثل غيره من مسلسلات

مانتوفاني

mantovani يقول...

eShamiYa_RockS

معادلتج صحيحة ... لكن الكويت اهي
الخاسر الوحيد من نتيجتها

الله يستر

مانتوفاني

mantovani يقول...

مطقوق

كشف الحقائق اولا

و من ثم ... اشد العقاب

مانتوفاني

mantovani يقول...

روان

اللهم امين

مانتوفاني

mantovani يقول...

مس كويت

و الله احنا لو الله يفكنا من الوسايط
و تشابك الصلاحيات جان حفظنا هيبة القانون .

الله كريم

مانتوفاني

mantovani يقول...

فهد العسكر

الله يحمينا

مانتوفاني

Don Juan يقول...

و اذا كانوا الي ماسكين السلك العسكري عاجبهم الوضع ,, شو بدك تعمل آآآآ شو بدك تعمل :/

PS

( لتجنب الملل الذي أصابكم )

هوه سؤال صغير لا مؤاخزة ,, هوه انته كنت منهم و مشترك معاهم بالموضوع ده ؟

لأنه الكلمة بتاتاً البتة مو غريبة علي و يابتلي انا و غيري عوار راس شدييد أوي D;

gawga3a يقول...

الله يحفظها يااارب

mantovani يقول...

دون جوان ...

حتى لو عاجبهم , احنا مو عاجبنا
و اذا عندك صديق عسكري دورك انك
تكلمه و توعيه ان الماديات مو كل شي

دون جوان ...

انا من المجموعه اللي يت بعد اللي تقصدهم على طول ... و لا تخلي التافهين يناقشونك بهالقضية

لما الحين في ناس يناقشونكم على الملل الذي اصابكم ؟؟؟

لول

عزيزي , اذا تبي شي شيات ترى حاضرين

مانتوفاني

mantovani يقول...

قوقعه

تحياتي لج و الله يحمينا و يحمي الكويت

مانتوفاني

على نفسها جنت براقش يقول...

اول شئ
مبارك عليك الباجى من الشهر


بخصوص المسلسل ما شفته

بالطريق بالطريق

:)

اما حاميها حراميها


بالله عليك لما يكون مكان حيوى و حساس بالدوله و يشتغل فيه الفاشلين و اللى ما عندهم شهادات
اشتبى يصير

و المتعلمين ايام التجنيد الالزامى كانوا يتنحشون الى ان يصير عمرهم 30
او اعرف واحد ظل ياكل و صار متين الى ان ياه الاعفاء
و الى هاليوم مبتلش بالوزن

قول لى منو صج يحب الديره و يحميها

يعنى بالغزو بينت معادنهم صج و شلون قلبهم على الديره

و طبعا كعادة الكويتيين قومة الحصن بدمهم للاسف


اذا ما يكون ولاءهم للديره و من قلبهم
ما يترس عينهم الا تراب القبر


الله يحفظنا عايشين عالبركة

Yang يقول...

شتبي من سلك عسكري, ضابطهم الكبير ماخذ الثانوية العامة من مصر.

هذي الكويت صل على النبي.

mantovani يقول...

براقش

علينا و عليج

كيف حالج من زمان ما سيرتي علينا

طيب ليش ما تصير في حملة لاصلاح المؤسسة العسكرية ؟؟؟

اصلاح مو تغيير و لا تشويش او شيء سلبي

نبي الشعب يقدم رؤية ايجابية للمؤسسة العسكرية لحماية ابنائنا العسكريين
و بالتالي حماية الكويت

مانتوفاني

mantovani يقول...

يانج

شكرا على الزيارة اللي تتشرف فيها
مدونتي :)

عزيزي , الدراسة في مصر هو بمثابة
توزيع شهادات دراسية لمن لا يستحقها

و الدولة التي تبتعث ابنائها للدراسة
في مصر يجب ان تعيد النظر في هذه الخطوة
و من يتخذ هذه الخطوات


مانتوفاني



.

Mok يقول...

من يخون الدولة اؤيد خكم الاعدام عليه وموتت جلب

لانه سيكون وراه قتله ابرياء

Unknown يقول...

عندي اللى يخون اكثر من اللى يقتل ومع الاسف يمثل اهم جهاز بالدولة

Blog 3amty يقول...

أسد الجزيرة هااا ..

(تم تعديل هذه المشاركة بواسطة واحد واصل)

mantovani يقول...

موك

الموت للخونة

تحياتي

مانتوفاني

mantovani يقول...

مشاري

باب النجار مخلع

مانتوفاني

mantovani يقول...

بلوج عمتك

و الله انت اللي واصل بس ماني متحلطم تضامنا مع حملتك

مانتوفاني