الكويت الان

الأحد، 24 فبراير 2008

ثــقــافة الاحـــــتفال

الاحتفال في ابسط و اتفه تعريفاته

انه اسلوب للتعبير عن شعور ما باستخدام ادوات معينه ..

عندما نحتفل في العيد ... يقوم الانسان بلبس اجمل ما لديه و التعطر ,, و اعداد المأكولات و المشروبات و تبادل الزيارات ... الخ الخ الخ
بالنسبة للاحتفال بالعرس , يتم لبس ملابس معينة للرجل .. و اخرى خاصة بالمرأة .
بالنسبة للعيد الوطني , تقوم الشعوب بالاحتفال بالخروج حاملين الاعلام و صور للزعماء , الخ
.
و سأتوقف عند الاحتفال بالعيد الوطني في الكويت :
في وقت ماضي عندما كنا اطفال كان الوالد يأخذنا لشارع الخليج لنشاهد الالعاب النارية , و الجوالة و المواكب
و بصراحة كانت متعة ما في بعدها متعة ... احتفال في قمة العفوية و النظافة و الولاء

اليوم اختلف الاحتفال شوي ...
قمنا نشوف مظاهر غريبة علينا و الوضع قاعد يصير (أسوأ) سنة بعد سنة :

رغوة
تلثم
رقص
استعراض سيارات
رش صبغ (موديل يديد)


السنة اللي طافت واحد كان قاعد يرش على سيارتي رغوة ... و لما خلصت رغوته حذفني بالعلبة ... ليش مادري
كسرلي جزء من الجام .
هذا غير الناس اللي يحطون بول و انتو بكرامة بالتفافيخ

بول ؟؟؟؟؟
تحتفل بالعيد الوطني و التحرير ... و ترش على الناس بول ؟؟؟

عساك ما تبول قول امين , شلون يعني ؟؟؟

شلون ؟؟؟
بول ؟؟؟

------

انزين شالطريقة يعني احنا متى نصير اوادم ؟؟
ليش ما يسوون لنا كرنفالات محترمة ... ميخالف سكروا الشوارع و سوولنا مواكب و فرق وطنية محترمة
وايد احسن و ابرك من هالبشر اللي تزحف على الديرة و تسوي مشاكل ...

اقل ما فيها نوفر هالتعب اللي على الشرطة , و نوفر الاحراج عليهم

----

انزين منو اللي عاجبة موضوع الرغوة ؟؟

ليش ما يمنعونها ؟؟
كلها مواد سامة و تحرق العين

هذا غير سالفت : ليش راش على اختي ... انت راش على امي ... انت وصخت سيارتي
هذا غير الحبيب اللي حذفني بالقوطي مال الرغوة و كسرلي الجام ... ليش مادري

------------------------------

بالنهاية مبروك عيدج يا الكويت

مبروك عيد التحرير

تحياتي لكم

هناك 12 تعليقًا:

Mohammad Al-Yousifi يقول...

عمري ما طلعت مسيرة

it doesnt make sense to me!

vancouver يقول...

مانتوفاني


كل عام والكويت واهلها بخير

والله انك صاج
لو الدوله تخطط لاحتفالات مثل الاوادم
ويخلون الناس تقعد على الجوانب
ويشوفون مسيرات ونشاطات مرتبه جان محد استخف

بس تاركينها عشوائيه
ليش ما ادري



شنوووووووووووووووو
بووووول
وانت بكرامه اول مره اسمع فيها هذي
اشهالحقاااااره
؟


الله يديم الافراح ويديم علينا نعمه العقل
:)))

mantovani يقول...

مطقوق :

مسيرات قبل كانت روعة و تعبير عفوي عن الفرح , و صدقني الاحفالات و المواكب القديمة كانت حلوة لو ترجع (بدون همج)
و الله راح تنطر هالاحتفال مناطر

لكن الهرج و المرج اللي صاير الحين لاء
غلط بحق وزارة الداخلية انها تستمر بالسماح لمثل هالهيصة اللي مالها اي معنى

----

فانكو

و انتي بألف صحة و سلامة و انشالله عامرة الكويت باللي يحبونها

على قولتج

الدولة لو لها خلق بس شوي تخطط لنا
و توجه الناس و تحط عقوبات و ضوابط
حق الاحتفالات و الله نصير مثل سويسرا
و احسن

الديرة فيها ناس مرتبة و تحب تفرح و تستانس

...

و انتي و اللي يقرى بكرامة

مو بس بول حشاكم ... مزيلات الشعر (النير) دايما حاضرة بالمسيرات مالت هالايام ...

و العنف و المشاكل

الداخلية هالسنة صادرت عصي و مطاعات (عجرات)
اكثر من اللي نشوفهم في مسلسلات الصعايدة

و خربوا فرحة الناس السنعة بهالرغوة اللي مادري ليش سامحين فيها لما الحين



---
تحياتي لكم و كل عام و انتو بخير

مانتوفاني

Selezya يقول...

فشله !!

ماتسوى على الناس اللي زايرينا من بره واخرتها هذي احتفالاتنا !!

Barrak يقول...

انت تخيل واحد رايح يحتفل وتحت كشن السياره عجره
ثقافة الاحتفال اندثرت

وعندي نقطه حبيت اوضحها
ليش علم الكويت صار بهالرخص
شنو يعني غتره على علم الكويت
شنو عباة على علم الكويت

العلم له احترامه

وايد عجبني البوست

mantovani يقول...

تحياتي لكم

سيليزيا :

المشكلة ان اللي يايين لنا من برا
و من دول الخليج

و تحيديدا من السعودية و قطر
قامو يسوون نفس اللي نسويه

و قاموا يتمادون

و الشرطة

(( ما يسوون شي ))

يمكن عاجبهم الوضع

انا صارلي موقف

جدام شاليه الاهل تيمعوا سعوديين و ربعهم كويتيين ماني قايل بدو

و ازعاج بالناس و رش رغوة و رقص و
حركات

و (( كلام وصخ ))

لما كلمنا الشرطة



ماصار شي

mantovani يقول...

براك


الشكوى لله

اما بخصوص العلم ...

حدث ولا حرج

ساعات تلاقيه طايح على الارض بعد
الاحتفالات الهيلقية



الله كريم

صبا يقول...

كل عام وانت بخير... صج متاخر شوي بس السموحه

أأأأأأأأخ وما ادراك بمسيرة العيد
الوطني
كسافه
هلاقه
قلة ادب
اتصدق دشيت المسيره بالغلط بعد ما طلعت من السينما :(

بهذلوني ؛؛رشو علي السياره فوم ؛لا وبعد يحاولون يفتحون باب السياره بس الحمدلله قافله الباب؛؛يعني ما كفاهم الفوم علي السياره يبون يرشون علي الصراحه شي مؤرف ويفشل ؛غير الحجي الوصخ الي بقطونه وكأن عايشين بغابه


الصراحه المسيره تفشل
والاعلام علي الارض
وازيدك من الشعر بيت

الشرطي معاهم؟؟؟؟؟؟؟؟

والله يحفظ الكويت من كل شر

تحياتي

غير معرف يقول...

nseeet a7ad el aslee7a ;p
rshash el maaay o shar6 ykoon feh may baaaaaaaaaaaaaaaaaard ;D

مــعـــارض يقول...

للأسف الشديد ما عادت مناسبة العيد الوطني والتحرير ترسم على وجوهنا البسمة ولا تملئ قلوبنا بالفرح والسرور بسبب الاغتصابات المتتالية والمستمرة من قبل قوى الفساد على كويتنا الحبيبة، وبسبب مفهوم الشعب الخاطئ الذي يعلن ولائه لأشخاص وليس للكويت! والذي يعبّر عن مشاعره بكل عنجهية ولا مبالاة من خلال المسيرات المتخلّفة والغير حضارية!... وأيضا بسبب تخاذلنا المؤسف!!!...

mantovani يقول...

صبا:

حياج الله و مسموحة :)

و الله ان شي يضايق اللي يصير لازم نوقف وقفة جادة علشان تتنظف الديرة

و ديري بالج مرة ثانية بالعيد الوطني لا تباعدين


:)

mantovani يقول...

معارض ...


حياك الله و تشرفت فيك

لكن شنو تتوقع الحل ؟؟؟