الكويت الان

الأحد، 29 يونيو 2008

لا يوجد عنوان

تحية طيبة و بعد

اليوم يصادف عيد زواجي الثالث , و احب اهدي زوجتي العزيزة و قراء هذي المدونة الاعزاء
كلمات بسيطة اعبر فيها عن اهمية هذا الحدث في حياتي :

زوجتي العزيزة
تحية طيبة و بعد ,,,
منذ ثلاث سنوات و انا مرتبط بك بأروع العلاقات الانسانية و هي علاقة الزواج , تلك العلاقة التي يعتقد
البعض انها سهلة في عمومياتها , و بسيطة في تفاصيلها و لكنها في الاساس حياة معقدة ,,,
حياة مبدأها الاول نبذ الانانية و الاستغناء عن اشباع الذات و خلاص

حياة تضعف فيها الانا و تكثر فيها صيغة الجمع ... و اتلذذ في رد الصدى من الناس بصيغة المثنى

زوجتي العزيزة ... نعم

في السنوات الثلاث الاخيرة لم اكن الزوج المثالي , و في السنوات المقبلة لن اكون كذلك ...
ولكني سأحرص - كما كنت - على ان اكون الزوج المخلص المحب

سأحاول جاهدا ان ارسم البسمة على شفتيك , سأقاتل من اجل حصولك على لحظات سلام و هدوء
في عشنا الصغير

زوجتي العزيزة ,,,

لن اكون الزوج المثالي ...

حتى لا تشعرين بالملل ,,, فالمثالية امر ممل ,,,

عندما اكون مثاليا ستنقرض الخلافات ... و لن اراضيك و تسامحيني ...

ستنقرض المجادلات ... و لن نخرج بملاحظات تدفع حياتنا للامام ...

عندما اكون مثاليا ,,, لن انسى ... و لن تبتسمي عندما تعلمين انني تائه و نسيت امر ما

عندما اكون مثاليا ... لن اكون انا


زوجتي العزيزة

في سنتك الثالثة زوجتا وفية لي ... لا اطلب منك شيئا سوى الصبر و طولة البال
فالانسان بلا هؤلاء يحترق و يضيع في دنيا معقدة و يحيد عما كتبه الله للانسان

زوجتي ,,,

في عيدنا الثالث اهديك مشاركات و مشاعر مدونين ... و مدونات لا نعرفهم
و لا يعرفونا ... سوى اننا نشترك جميعا في الشعور و في صدق التعبير

مشاركاتهم بحد ذاتها ... عيد


زوجتي

تعرفين انني لا اجيد الكلام , افضل ان اتوقف
فحبي و تقديري لك لا يقاس بعدد الجمل
و لا ببلاغة التعابير ...



اصدقائي المدونين
في هذه المناسبة اتمنى لكم التوفيق في حياتكم
و لا تنسوني و زوجتي بالدعاء




مانتوفاني


هناك 113 تعليقًا:

فريج سعود يقول...

لا يطقّون زوجتك عين يا معود
الله يهنيكم الى اخر العمر

Blog 3amty يقول...

عسى الله يسعدكم ويهنيكم :)

5roofa يقول...

الله يخليكم البعض و يوفقكم و يهنيكم ياااااااارب

:)

salamz dear...

White Wings يقول...

كل عام وأنتما بخير
تنتفي الحاجة للكلمات أمام صدق المشاعر التي تثبتها الأفعال
أبقاكما الله حبيبين وصديقين مدى الحياة
تحية خالصة مني لزوجتك الغالية

الزين يقول...

يعله العمر كله
الله لا يغير عليكم ويحفظكم من كل شر
بخت عينها فيك وبخت عينك فيها

:)

UmmEl3yal يقول...

كل عام وأنتما بحب وسلام .. اللامثالية توابل العلاقة طالما نتقبلها ولا نحاربها .. لكما كل الحب والامنيات بعيد زواج خمسيني سعيد :)

Barrak يقول...

الله يبعد عنكم العين


غلطان ماحطيت عنوان

انا اختارلك عنوان

التقاء الارواح


ودي اكتب فيكم قصيده
بس خايف عليكم من العين

الله يحفظكم

mantovani يقول...

فريج سعود

يطولي عمرك ,انشالله ما اتيينا العين
دام ربك حافظنا ..

بعدين على شنو يعطونا عين ...
انا لو اعطيك بطاقتي المدنية

تطلع باون

مانتوفاني

mantovani يقول...

بلوج عمته

الله يسمع منك , و يرزقك في بنت
الحلال اللي تخليك تسكر بلوغ عمتك
و تطل علينا من بلوج زوجتك


مانتوفاني

mantovani يقول...

خروفة

الله يسلمج و يخليج
و انشالله نشوفج
حرم سعادة الكبش

كبش من حبج طبعا
مو كبش صجي

:))))))


مانتوفاني

Mohammad Al-Yousifi يقول...

الله يوفقك يهنيك

و يبعد ام بي سي 4 عن اراضيك

mantovani يقول...

الاجنحة البيضاء

و انتي بخير و صحة و سلامة
الله يعينا و يثبتنا على
صدق المشاعر و تطبيق الافعال
و الله يسمع منج , و نبقى
اصدقاء و حبيبين

لان الحب بدون صداقة
مثل الصداقة بدون حب

و التحية راح توصل
انشالله

و صدقيني انا و زوجتي سعيدين
جدا بكلماتج الصادقة

و دمتم سالمين


مانتوفاني

mantovani يقول...

الزين

الله يسلمج على هالدعوة الصادقة
و مشكورة على هالكلام الجميل

احرجتيني بصراحة


مانتوفاني

mantovani يقول...

ام العيال

تعجبيني , و صح كلامج
لو الرجل مثالي
و الله راح تطفش الحريم
منو يراددون
و على منو يتزعلون

و اشكرج على عاطفتك و امنياتك
الصادقة , التي لا اتردد على
مبادلتك بها

مانتوفاني

mantovani يقول...

براك

التقاء الارواح عنوان رائع
و الاروع ان انت اللي حطيته

انا ما ابي منك قصيدة يا اخي
ابي ديوانك مطبوع و فيه اهداء
و توقيع منك لأسمي الحقيقي
و راح يكون عنوان لكل كلمة
جميلة , لكل شعور صادق
عنوان للخيال

و انا ادعي ان الله يبعد عنا و عنك
و عن كل الناس شر الحسد و العين

الحياة جميلة

تسلم روحك يا اخي


مانتوفاني

mantovani يقول...

مطقوق

الله يخليك ... و يبجيك
و يعزك .... و يهنيك
و 10 اخوان لسلمى .. يعطيك

=====

اي و الله , الله يبعدنا عن
ام بي سي 4

و عن مهندهم اللي ينافسني
بالجمال


مانتوفاني

lawyer يقول...

الله يباااارك لك و يجمعكم على الخير يارب دنيا و اخره

و لا يغير علييييييييكم انشاء الله
و يسسسسسسسسسسسسخرك لها

الواضح جدا من اعتذارك انك زوج غير مثالي ... و اتعذر لها في ان المثاليه شي ممل

مممممممممممم

عجبني هالترررررقع مونتفاني
ههههههههههه



الله يديمها عليكم محبه يارب




موتني ضضضضضضضضضحك مطقوووووووووق

ياربي اشفييييييه مهند مافيه شي

يعني انشوووووووف الزين و انصد !

darkness يقول...

الله يخليكم لبعض

و يطرح البركه بيناتكم

و يرزقكم الذريه الصالحه

و يهديها لك و يهديك لها

كل عام و انتو بالف صحه و سلامه و هنا


:)

Kuwait يقول...

الله يحفظكم ويخليكم لبعض ويديم المحبه بينكم ويجمعكم على الخير دايما :)
وكل عام وانتوا بألف خيرررر وصحه وعافيه ..
وان شاء الله تحتفلون كل سنه بهالمناسبه الحلوه والله لا يفرق بينكم ..

Mamloo7a Q8ia يقول...

كل عام وانتوا بخير وصحه وعافيه وسعاده
عسى الله يخليكم لبعض ولا يفرقكم من شر
ويحقظكم من العين ويحميكم

صبا يقول...

عسي الله يهنيكم ويخليكم لبعض يارب


:))

الله لا يفرقكم انشالله ويبعد عنك وعنها السوء

والعمر كله مع بعض

الله يحفظكم يا خوي وبلغها سلامي الخاص
؛)))



تحياتي من قلب

mantovani يقول...

المحامية لوير

ولييييييييييين

احنا نرقع من صوب ,, و انتي تخربين من صوب

شلون يعني ... محامية و تزلغين وايرات؟؟

تبون تكسبون من ورى ظهورناااااااااا

هاااهاههاهاهاهها :)))))))

مشكورة وايد على كلامج
و صدقيني زوجتي سعيدة
جدا بتعليقاتكم و مشاعركم
الرقيقة


بس مرة ثانية , لما تشوفين
ريال قاعد يرقع و يضبط اموره
و يتفلسف لا تخربين السالفة

مانتوفاني

mantovani يقول...

داركنس - الظلام

اشكر زيارتك الجميلة

كلماتك الجميلة
تجعلني اردد دعائك الى الله
اللهم باركلنا
اللهم ارزقنا الذرية الصالحة
اللهم ارضى علينا و احبنا
اللهم اهدينا
اللهم ارزقنا رضا والدينا
اللهم ارزقنا الصحة و العافية


امين


مانتوفاني

mantovani يقول...

كويت

الله يجمعنا وياج على خير
و الله دعواتج و كلامج
الطيب يخجلني بصراحة

و كل عام و انتي بخير


مانتوفاني

Mok يقول...

الله يخليكم للبعض دوم

mantovani يقول...

مملوحة كويتية

الله يسلمج و يحفظج
و يا عسى السعادة
فالج دنيا و اخرة
و ما قصرتي يا
اختنا العزيزة

مانتوفاني

mantovani يقول...

صبا

التحية وصلت طال عمرج
يبا ترى نستحي من هالكلام

وانشالله تلاقين السعادة و التوفيج
بحياتج , و شنووو بعد

الله يخليج لاهلج و ربعج
و يعطيكم الصحة و العافية يا رب

مشكورة على هالمشاعر الطيبة

و شصار على ال 10000 د.ك اللي
بروح فيهم سويسرا ؟


مانتوفاني

mantovani يقول...

موك - بس يا بحر

يا اخي انا مدونتي نورت بوجودك

الله يسلمك و ما قصرت على كلامك

مانتوفاني

lawyer يقول...

تعليق لمنتوفاني

انشاء الله عمي

تعليق للمدام

ماعلييييييييييييييج منه

:pPP

secret يقول...

مانتوفاني

كل عام و انتو بالف خير

و عسى ربي يحفظكم و يخليكم حق بعض و يبلغكم بعيالكم و ان شالله نفرح بمانتوفاني الصغير

صدقك مع نفسك و اعترافك بعدم المثالية لا يحط من قدرك ..
بل يرفع من شأنك ..
فلا كامل بين البشر ..

و هنيئا لكم ما مضى من السنين
و امنياتي لكم بأسعد منها من القادم من الأيام و السنين

أخوك

Blog 3amty يقول...

:)

والله ممكن

mantovani يقول...

المحامية - لوير

هاااههاههاهااهااهه و الله مت من الضحك ... يبا لا تخافين
شغل المحامين هذا ما يمشي

===
بخصوص مطعم الستيك اللي في سويسرا
بس الاقي الميموري و اطلع لج اسمة

حاضرين للمحامين

----

مانتوفاني

mantovani يقول...

سيكرت

امين يا رب العالمين يعطينا مانتوفاني
الصغير و نسميه سيكرت (فاهمني)
الله يرزقنا يارب


يا اخي لا اجد ما اقولة تجاه هذه الكلمات الصادقة , سوى تمنياتي
لك بدخول القفص الذهبي من اوسع ابوابه

فانت لا تعلم مدى جمال الطوق الذهبي
المرصع بأجود انواع الياقوت الاخضر
و تظهر منه سلسلة ذهبية طويلة
حتى تستطيع ان تتحرك قليلا ,,,

:)))

مع خالص محبتي

اخوك ايضا

مانتوفاني

mantovani يقول...

بلوج عمته

اي يالله شد حيلك و ييب لنا علوب فلفل
صغار يا الحبيب


مانتوفاني

حسام بن ضرار يقول...

كل عام و انتم و حرمكم المصون بخير

و نسأل الله حياة سعيده هانئه بالخير و الايمان و الطاعه لك و لنا و للجميع

Barrak يقول...

تامر امر

غالي والطلب رخيص

بس ابي ايميلك

لو تكرمت

mantovani يقول...

حسام بن ضرار

و انت بصحة و عافية و خير
و اشكرك على دعواتك الصادقة
التي زانها الايمان و الطاعة

مانتوفاني

mantovani يقول...

براك

دزيت لك ايميل

مانتوفاني

why me يقول...

الله يخليكم لبعض وكل عام وانتوا بخير :)


مطقوق اشسالفتك مع ام بي سي 4 و مهند لوول؟؟

ثاني تعليق اشوفه لك هذا

hehehe

qaqoqa يقول...

هذا البوست انا بخليه

كل مااعصب او اشوف مدة بوز من اللي عندي


اقراه بصوت عالي

mantovani يقول...

واي مي

الله يسلمج مشكورة على هالكلمات
و الله يخليج لاهلج يا رب


==

على فكرة :

يحقلك يا مطقوق انك تتضايق من
مسلسل نور

ما تلاحظ ان البطل مهند

مقلد تسريحة علي المفيدي
بكاركتر (جميل جمال) اللي بمحظوظة و مبروكة


مانتوفاني


.

mantovani يقول...

قاقوقة

يا اخي حياك الله اول شي

ثاني شي لا تقرى اللي مكتوب
بصوت عالي

قول كلامك اللي طالع من قلبك

سواءا زين ... او مو زين

اهم شي بس طول بالك

و قاقوقة


مانتوفاني

صبا يقول...

هااااااااااااااااا

ألووووووووووووووووووو


شخبار شهر العسل !!!!


آآآآخر يوم اليوم ,,, حدكم 3 ايام ؛)

وبس ؛))))


باجر نبي بوست يديد نبي البوم صور سويسرا :)))

Don Juan يقول...

الله يخليكم حق بعض forever ;D

BTW

تقدر تسوي أبلود حق اغنية " مرت فرح " ... دشت بمزاجي و مو لاقيها ام بي ثري :(

mantovani يقول...

صبااااااااااااا

انا موجووووووووووود

انا ما عندي شهر عسل الا بداية الزواج

لا اتييبين لنا عادات دخيلة

طال عمرج انا موجود بس قاعد اتأمل
علشان احط لكم اشياء حلوة

عجبتج سويسرا يعني ؟؟؟



مانتوفاني

mantovani يقول...

دون جوان

الللله يسمع منك و ينولك اللي في
بالك و احسن يالحبيب

هذا لنك فيه اللي تبي

http://www.khalidalshaikh-fans.com/music_library/AlbumNo6.htm

و اهداء مني لك :
صدق من قال



مانتوفاني

mantovani يقول...

يا جماعة

انا اهديكم الهيصة اللي هني

http://www.khalidalshaikh-fans.com/music_library/index.htm





مانتوفاني

قلب طفله يقول...

كل عام و السعاده و المحبه

بينكم تزيد و الهم و الكدر

ما يدل لكم طريج يارب

الله يخليكم لبعض و يحفظكم و

يسعدكم دنيا و اخره و يرزقكم

بالذريه الصالحه امين

معلش قت متاخره خيوو :)

enter-q8 يقول...

الله يجعلك و يجعلها ازواج صالحين

و يديم عليكم نعمة التوافق و الرضا امين

اما انا
فأقول حق زوجتي اللي قاعده يمي و تقرى

أحلمي اقولك هالكلام

mantovani يقول...

قلب طفلة

و الله مو متأخرة

حياج الله باي وقت

و الله يسعدج بحياتج و يخليج لاهلج يا رب

و تحياتي لج

مانتفوفاني

mantovani يقول...

انتر كويت - يسلملي عقالك

الله يسلمك و يخليك و مشكور على هالدعاء الطيب , الله يجعلنا من احبابه
الصالحين يا رب

و جملتك الاخيرة , تثبت انك زوج
رائع و احسن مني

لان اللي ما يقول , احسن من اللي يقول


تحياتي لك يا الغالي


مانتوفاني

Manal يقول...

Happy Anniversary
Wish you all the best
الله يخليكم لبعض و يوفقكم

mantovani يقول...

منال

اللللله يسلمج و يخليج
مشكورة و كل عام و انتي
بخير يا رب


مانتوفاني

Ra-1 يقول...

This post made me smile :)
!I hope your wife did read it
الله يديم الحب والتفاهم ما بينكم ويسعدكم ويحقق كل أحلامكم إن شاءالله :)

BLonDDyKe يقول...

الله يهنيك اخي الفاضل و عسى ربي يخلي هالسعادة ألف سنه :)
تحياتي

mantovani يقول...

روان

Yes she did :))))


تحياتي لج ومشكووورة على هالكلام الطيب

و مشكورة على هالدعاء الخالص

و زورينا لا تقاطعين


مانتوفاني

mantovani يقول...

بلونديك

الله يسلمج و الفال لج انشالله
الله يرزقج بولد الحلال اللي
يخلي ايامج كلها هنا و فرح

مانتوفاني

Unknown يقول...

الله يوفقك ويهديكم حق بعض ونسأل الله أن يرزقكم الذرية الصالحة انشا ءالله :)

mantovani يقول...

مشاري

مشكور يا اخوي على هالزيارة
و هالكلام الطيب , و الله يرزقنا

مانتوفاني

Super Woman يقول...

الله يسعدكم ويهنيكم

ويحليكم لبعض ولا يفرقكم


:)

mantovani يقول...

شلالات

و يسعدج و يخليج مليون مره :)))))

شكرا على الزيارة

مانتوفاني

esTeKaNa يقول...

أنا ويني عن هالبوست
!!
اسمح لي يا مانتوفاني
بس هذا اهم بوست كتبته
بوست ينبض صدق واحساس وحب
تدري شنو اهم ما يربط اي شخصين بعلاقه؟
الصدق والحب
وانته تتمتع في كلا هالصفتين
صدقك مع زوجتك الكريمه
واحساسك بكلماتك البسيطةوالرائعه بحبها
!!
وهذا بالتأكيد لم يأتي من فراغ
اكيدة انا من انها تستحق كل هذا الحب واكثر
الله يحفظكما ويتمم عليكم الفرح
ويرزقكم احلى واجمل من كل ما تتمنون
كن لها
الحبيب
والعاشق
والاخ
والصديق
ولتكن لك الدنيا بكل مافيها من احساس وجمال
:)

Najmah يقول...

عسى ربي يخليكم حق بعض
ويتمم عليكم
ويحفظ علاقتكم بالحب والاخلاص والوفاء
وكل عام والمحبة تظللكم
:)

غير معرف يقول...

الله يهنيكم ويسعدكم
يــــــــــــارب

ادعولي بريل جذي حبوب
وصالح ويخاف ربه

قلبت الكومنت دعوه لي مو لكم P:

mantovani يقول...

استكانه

مو انتي كاشته فينا يبا...
نزورج و ما تزورينا :))

مشكورة على هالكلام ... و الله ربطتي لساني ماني عارف شقول :)

بس اتمنى امنية صادقة
ان الله يوفقج و يخليج لاهلج
و اتمنى لج التوفيق بالخطوة القادمة من
حياتج ...

قولي امين

و كشتي فينا اكثر ^_^


مانتوفاني

mantovani يقول...

نجمة ...
حيالله من يانا
و مشكورة على هالكلام
و عساج توم تنورين السما يا نجمة

مانتوفاني

mantovani يقول...

غير معرفة

انتي الفين مشكورة على هالكلام الطيب

و انا ما اتمنى انج ترتبطين بواحد مثلي

لسبب

ان في ملايين احسن مني بدرجات كبيرة

و اتمنى ان الله يرزقج واحد منهم

مانتوفاني

بـنـت بـطنـهـا يقول...

عسى الله يخليكم ويسخركم حق بعض ولا يحرمكم من بعض يا رب

تبي نصيحة اخت؟؟

انت كتبت الكلام هني .. الحين روح وقول لها نفس الكلام .. ثق تماما وقعها راح يكون أحلى بوايد على اذنها.

عمر مديد تعيشون في بالحب والود والسعادة يا رب

برافو والله عليك

mantovani يقول...

بنت بطنها

مشكورة وايد على المرور و الكلام الطيب
نصيحتج بمحلها و انا قلت لها هالكلام

بس قالتلي كلامك مستهلك و مو كفاية

:)))))))))))))))


تحياتي لج و الله يخليج لا تقاطعين مدونتي
انا من زمان اتابع خواطرج , الى الامام
و لا تقاطعين التدوين


مانتوفاني

عــــــابره يقول...

الله يهنيكم ويخليكم لبعض
ويمتد بكم العمر شركاء .. اعواما عديده

ماشاء الله عليكم

esTeKaNa يقول...

وي وي
اشوف بهالتعليق تشره
عاد كل شي ولا مانتوفاني
انت الخير والبركة
وانت االاخو العزيز الغالي
نفرح وياك
وندعي لك من اقصى القلب وربي اعلم
!!
سامحنا على القصور
مقصره بس القراب مني يعذروني
وانت اخ عزيز وقريب من القلب طبعا
:)
عسى بس طاب الخاطر؟
انته بس اشرايك فيني وانا كل شوي اطل على البلوق
:Pp~

mantovani يقول...

عابرة

عبورج الجميل ... ارجوا ان ما يمر مرور الكرام ... اتمنى تزورينا دايما
بمدونتي المتواضعة

و شكرا على الكلام الطيب

مانتوفاني

mantovani يقول...

استكاااانة ...

لقيتينا عاد انتي , يبا هذي المدونة
موجودة علشانكم و الله

علشان اتكلم عن كل انفعال و شعور
و ودي الكل يستفيد منه بالايجاب
حتى لو كان كلامي سلبي في يوم من الايام

و مسألة انج تحطيني في مقام الاخ
هذا شرف اتمنى اني اكون قده



و للمرة المليون و الاخيرة
هذا مكانج و انتي عاد تزورينا
كل يوم
كل شهر
كل سنة

تأكدي انج رقم مهم في رصيد الناس
الطيبة


مانتوفاني

لؤلؤة يقول...

الله يجمع بينكم ع خير :)
وعقبال السنة الثلاثين ان شاء الله

Sweets يقول...

الله يهنيكم يارب و يخليكم حق بعض :)

2cool2care يقول...

بارك الله لك وبارك فيك وفي زوجك

آمرني اخوي قلت محتاج شي؟

بعثتلك بريد مارديت علي

انت موجود ابمسنجري وما اشوفك ادش؟

آمرني

Selezya يقول...

لو سألني الورد عنك ..
علميني وش أقول ؟
ولو وصلت أول جمالك..
كيف بوصل آخره ؟
كيف وانتي " روضة " من حلاها ..
كحلت عين الفصول .. !
رقتك " وردة " ..
وروحك كالطبيعة الساحرة ..!


إهداء لزوجتك :)

عسى الله يخليكم لبعض ولا يفرقكم وتنعمون بثبات ونبات بعد :)

أسفه عالتأخير
ماحبيت اطوف التعليق باعتبار المناسبه صارلها فتره بس هم مو طويله عاد وايد
:)
تتهنوون يارب

على نفسها جنت براقش يقول...

مبروك و لو انها متأخره


و حلو تبريرك لعدم المثاليه


:q


عسا دوم تكون بسعاده

ولد الديرة يقول...

عسى الله يجمع بينكم على خير

الله لا يخليكم

mantovani يقول...

لؤلؤة

تحياتي لج و الله يسمع منج
بس 30 سنة شوية يبا :)))

اشكر حضورج و كلماتج الرقيقة

مانتوفاني

mantovani يقول...

انا استطيع ان اراني في كل مكان

الله يسمع منج و يخلج لاهلج ذخر في كل
وقت ... الله يوفقج

مانتوفاني

mantovani يقول...

توو كوول موو كيير

حبيبي انا اسف شوي انشفلت
و راح ارد على البريد
لكن لا تبطل كتابة


مانتوفاني

mantovani يقول...

سيليزية

على راسي و الله الاهداء

و مشكوره على هالدعاء

الله يثبتنا يا رب

سيليزية صارلج فترة ما تزورينا
شدعوة يبا

مانتوقاني

mantovani يقول...

براقش شخصيا

يبا الحمدالله على السلامة

و مشكورة على سؤالج و زيارتج

مانتوفاني

mantovani يقول...

ولدالديرة

و عسى الله يجمعنا وياكم على خير
و مشكور يا الحبيب

مانتوفاني

غير معرف يقول...

مانتوفاني راح تحوشك الإزاله لان مدونتك صارلها جم اسبوع مافيها موضوع يديد ..;q

mantovani يقول...

ايها الغير معرف

يا بعد شبدي انت , و الله اني مشغول لي
عيني

و انشالله لي عودة

مانتوفاني

صقر قريش يقول...

الله يخليكم لبعض بس ياخوك علمتني شي بصراحة لما اتزوج بسويه إذا آنا ماكنت مثالي لها بنقل كلامك بعد إذنك يعني :) موفقين إن شاء الله

Blog 3amty يقول...

يعني شلون !!

نطر عيد زواجك الرابع عشان نشوف بوست يديد !!


تره مي حالة، كل يوم طاق شلاله وياي ودش وأشوف ماكو بوست .. تدري شلون !!

إذا كتبت بوست يديد "أديني رنّه" على قولة المصاروة !


(عمتك المخلصة)

Selezya يقول...

منك السموحه والله من وين لي وين اشبك مأذيني الصيفي

خلوني اخلص صيفي وحتشوفوووووو
:)

mantovani يقول...

صقر قريش

حياك الله يا صقر ... انت تزوج

و خلك معاي , و انا اوديك بداهية

ههااهاهاه ... موفق انشالله

مانتوفاني

mantovani يقول...

بلوج عمتنا

حبيبي و الله يا امير دار الجيل
المشكلة هاليومين انا حدي مزحوم
و انشالله بطل علكم طله حلوة

و انشالله ما تنطر وايد

عاد انت طول بالك و انشالله خير

و راح اعطيك رنتين بعد

مانتوفاني

mantovani يقول...

سيليزية

الله على الصيفي و ايام الصيفي

كان الواحد يداوم من الاسبوع الثاني
و الاسبوع الثالث امتحانات
و الاسبوع الرابع يوم و يوم

و الفاينال

الله يوفقج انشالله

و انشالله كله امتيازات

مانتوفاني

سدرة العشـــاق يقول...

لله يسعدكم ان شاء الله دنيا و آخرة و يبعد عنكم العين و الحسد

----

وينك بطيت علينا

عسى المانع خير ان شاء الله

: )

mantovani يقول...

سدرة

مساج الله بالخير , يبا حالنا من حالج
انتي بعد ساعات تختفين :))))

انا طال عمرج موجود بس مشغول حبتين

و مشكورة على الكلام الطيب


مانتوفاني

Blog 3amty يقول...

والله حرام قاعد تدفع أجار على الفاضي .. ضمنها وانا أخوك :P

mantovani يقول...

بلوج عمتي

طال عمرك , المدونات الستايل الكشخة
ما ينزلون بوستات كل يوم و الثاني

شنو انت ما تعرف ؟؟؟

مانتوفاني

Blog 3amty يقول...

يا أعمي أكتب قبل لا يسوونه بفلوس وتتحسف !

mantovani يقول...

بلوج عمتي

يبا احنا ما تهمنا الفلوس

======


ترقبوا !!!


مانتوفاني

NewQ8 Bride يقول...

يا رب الله يوفقكم و يتمم عليكم و يحفظكم من العين

mantovani يقول...

عروستنا

الله يسلمج و انشالله نهنيكم بعيد زواجكم
ال 50


مانتوفاني

U-Turn يقول...

الله يخلييك لها ويخليها لك إن شاء الله
ويهنييكم
ويطول بعمركم
ويرزكم الذريه الصالحه يا رب

:)

مشاعر أكثر من رائعه وعواطف جميله
الله لا يخليكم من بعض :]


يعطييك العافيه
وعساك على القوة

charisma يقول...

:)
الله يحفظكم ولا يخليكم من بعض ويخليك ذخر لهم ان شاءالله
وكل عام وانتو بالف خير

mantovani يقول...

يو تيرن عندنا يا مرحبا يا مرحبا

زيارتكم لنا شرف ...

و شكرا على الكلمات الرقيقة

تحياتي

مانتوفاني

mantovani يقول...

كاريزما

و انتي بألف صحة و عافية يا رب

و هم حيالله من يانا

مانتوفاني

fatto يقول...

الله يخليكم حق بعض

bodalal يقول...

عسى الله يهنيكم ويسعدكم ويبعد عنكم كل شر ..
ويرزقكم الذرية الصالحة اللي تنور حياتكم وتزيدها سعادة على سعادة ..

أهنيك من كل قلبي على قدرتك بأن تكون " إنسان " راقي .. يعرف متى يجب أن تتوقف " الأنانية " وحب الذات ..

ورد وود ..

mantovani يقول...

فاتتو

شكرا على الكلمات الرقيقة و المرور

تحياتي

mantovani يقول...

ملحد سابق

زيارتك لمذونتي المتواضعة شرف عظيم
لي و اتمنى انك ما تقاطع

مانتوفاني

غير معرف يقول...

شي يفرح القلب ! ياااااااااااااااااااااااااااااااارب يسعدكم دنيا و اخرة و يخلي حياتكم احلى حياة بالدنيا يارب قول امين : )

بنت الشاميه يقول...

كل سنه وانت طيب وعساكم بهنا وسعاده
طول العمر والله لا يحرمكم من بعض
الله يكثر من امثالك .....لو اكو مثلك وايد جان ما صار عندنا طلاق

الله يحفظكم ويحميكم من العين

mantovani يقول...

مي

تحية طيبة و بعد

لي عظيم الشرف في زيارتج لمدونتي

اتمنى لك حياة جميلة

مانتوفاني

mantovani يقول...

بنت الشامية

حيالله الجارة ... سلمج الله اخجلتيني بكلامج .

الحياة مليانه ازمات و مشاكل
الحياة عذبتني بما فيه الكفاية

حتى حياتي الزوجية مو سهلة

المهم ...

الى ان نلتقي .. كوني سعيدة

مانتوفاني